Gyðingaandúð

Gyðingaandúð má finna í ýmsum kimum íslensks samfélags og er heldur dapurlegt að horfa upp á það. Þeir eru til sem reyna til dæmis að fá fólk til að sniðganga vörur frá Ísrael og jafnvel greiðslumiðlun þaðan. Meira að segja hjálparsamtök sem ættu að sýna hlutleysi láta hafa sig út í slíkt. Ísrael berst fyrir tilveru sinni líkt og það hefur gert frá stofnun ríkisins og enn er töluvert til af fólki sem gerir kröfu um að Ísrael verði þurrkað út af yfirborði jarðar og íbúarnir með. Slíkt er jafnvel kyrjað á Vesturlöndum sem almennt hafa staðið með rétti Ísraelsríkis til að eiga bjarta framtíð, eins og rétti annarra til hins sama.

Ísraelsmenn hafa þurft að beita hervaldi til að tryggja framtíð lands síns og íbúa þess. Þeir reyna að beina því gegn hryðjuverkasamtökunum Hamas, en stundum falla almennir borgarar og því miður hafa margir fallið að þessu sinni. Það mannfall skrifast þó alfarið á hryðjuverkasamtökin sem áttu upptökin að átökunum og beindu árás sinni beinlínis gegn saklausum borgurum í Ísrael. Og hryðjuverkasamtökin hafa ítrekað orðið uppvís að því að nota almenning á Gasa sem skildi og aukið þannig mannfallið. Fyrir utan gíslana sem þeir námu á brott frá Ísrael í sama tilgangi.

Mjög eðlilegt er að reiðast yfir ástandinu fyrir botni Miðjarðarhafs en reiðin ætti að beinast gegn þeim sem áttu upptökin og viðhalda átökunum. Ef Hamas hættir að berjast hættir mannfallið. Ef Ísrael leggur niður vopn ræðst Hamas á almenning í Ísrael.