Fjarskiptafélagið Síminn hf. hefur undirritað samning um kaup á öllu hlutafé í BBI ehf., Dengsa ehf. og Billboard ehf., en fyrirtækin þrjú reka m.a. skilti á strætóskýlum, auk stærri skilta, og eru langstærst á sínum markaði.
Heildarvirði fyrirtækjanna þriggja í kaupunum er 5.150 milljónir króna og þar af verða 1.000 milljónir greiddar með hlutafé í Símanum, að því er segir í tilkynningu til Kauphallarinnar.
Fyrirtækin starfa öll á auglýsingamarkaði og munu styrkja enn frekar þjónustuframboð Símans á því sviði, segir í tilkynningunni.
Fyrirtækin verða starfrækt sem sjálfstæðar einingar fyrst um sinn. Vésteinn Gauti Hauksson, sem hefur leitt félögin þrjú, mun halda áfram sem framkvæmdastjóri þeirra.