Manchester City er komið áfram í 16-liða úrslit enska bikarsins í fótbolta eftir dramatískan 1:0-útisigur á Tottenham í stórleik í Lundúnum í gærkvöldi.
Eftir markalausan fyrri hálfleik skoraði varnarmaðurinn Nathan Aké af stuttu færi á 88. mínútu og tryggði Englandsmeisturunum sæti í næstu umferð, en City er ríkjandi bikarmeistari eftir að liðið vann þrefalt á síðasta tímabili.
City var eina liðið sem tryggði sér sæti í 16-liða úrslitunum í gærkvöldi. Í bikarnum þarf annan leik ef liðin skilja jöfn í þeim fyrsta og jafntefli varð niðurstaðan í öllum hinum þremur leikjum gærkvöldsins.
Jafnt í úrvalsdeildarslag
Chelsea og Aston Villa gerðu markalaust jafntefli á Stamford Bridge í Lundúnum og mætast þau aftur á Villa Park.
Bristol City úr B-deildinni náði í markalaust jafntefli á heimavelli gegn Nottingham Forest úr úrvalsdeildinni og fær heimaleik gegn Forest-liðinu í verðlaun.
Þá skildu Sheffield Wednesday og Coventry jöfn, 1:1, í Sheffield í B-deildarslag. Victor Topr kom Coventry yfir á 45. mínútu en Djeidi Gassama jafnaði á 84. mínútu og þar við sat. Þau mætast aftur í Coventry.
Þrír úrvalsdeildarslagir verða á dagskrá í bikarnum í dag, laugardag. Everton og Luton mætast í Liverpool, Sheffield United og Brighton mætast á heimavelli Sheffield-liðsins og Fulham og Newcastle mætast í Lundúnum.
Liverpool og Norwich mætast á sunnudag, sem og Newport County og Manchester United.
Til baka
Leita í greinasafni
Prenta grein