Á föstudag sendi Ingólfur Ómar mér póst: Heill og sæll, Halldór, á þessum hrollkalda bóndadegi datt í hug þessi braghenda:
Yggldur Þorri ýfir brána oft og
tíðum
kaldsamur með kyljum stríðum,
kuldabitru og norðanhríðum.
Skírnir Garðarsson sendi mér póst á laugardag: Var að taka til hjá mér og fann þessa vísu sem varð til í bændaferð til Slóveníu fyrir allmörgum árum. Fyrripartinn minnir mig að Sigurður Baldursson eigi, hann er svona:
Pena ef þú píu sérð,
og prufa vilt að ná 'enni.
Ég og fleiri botnuðum. Minn var svona:
Henni bjóddu í bændaferð,
þá bráðnar klakinn á 'enni.
Gunnar J. Straumland skrifar á Boðnarmjöð: Er ég hafði fylgst með fregnum herveldis nokkurs í Austurlöndum kom þessi aldýra staka í vísnakompu:
Drungann þyngir drómi tára,
dimmir bíða klakkar ljóðs.
Gungan kyngir grómi sára
grimmir stríða rakkar blóðs.
Ólafur Stefánsson finnur til bjartsýni þó að þorri sé aðeins nýbyrjaður:
Lifi eg með léttan mal,
lifna brátt við hanans gal.
Þegar verður vor í dal,
vil ég bæði, get og skal.
Jón Jens Kristjánsson skrifar: Lilja Alfreðsdóttir vill að utanríkisráðherra sé með í ráðum varðandi þátttöku í Júróvisjón:
Þeim bestu verður ei bylt af stalli
Bjarni, Katrín og Sigurður
þar eiga að mæta sem Þrjú á palli
og þá er sigurinn öruggur.
Óttast ekki andardrátt Dags – fyrirsögn viðtals við Einar Þorsteinsson í Mbl.
Það duga mun lengi af Degi skíman
sem dundar nú slakur við eitthvað nýtt
en ef að hann byrjar að anda í símann
er Einari sama og hræðist lítt.
Í Sjöundu Davíðsbók segir að höfundur hafi verið hrifinn af feita matnum en borðað fleira þegar bauðst til að viðhalda fjölbreytni:
Rjóma, selspik mör og makríl
mest ég et
en timbur, nagla, ál og akrýl
ef ég get.