Norður
♠ K105
♥ 1072
♦ Á8532
♣ Á6
Vestur
♠ 97652
♥ Á643
♦ K4
♣ K5
Austur
♠ G8
♥ KG85
♦ D
♣ 1087432
Suður
♠ ÁD4
♥ D9
♦ G10976
♣ DG9
Suður spilar 3G.
Après-sveitin sigursæla er skipuð dönsku hjónunum Morten og Dorte Bilde, syni þeirra Dennis Bilde og Martin Schaltz, syni annarra þekktra bridshjóna í Danmörku (Dorthe og Peter Schaltz). Þriðja par sveitarinnar mynda þýsk-danska stórstjarnan Sabine Auken og spúsi hennar Roy Welland, sem er fæddur Bandaríkjamaður en spilar nú fyrir Þýskaland.
Sabine var svolítið heppin í þessu spili frá úrslitaleik WBT-Masters. Hún fékk út spaða gegn 3G, setti tíuna úr borði og drap gosann með ás. Renndi svo tígli yfir á drottningu austurs. Þar sat á fletjum fyrir Indverjinn Keyzad Anklesaria og honum datt ekki í hug að spila öðrum spaða. Hann skipti yfir í hjarta og valdi GOSANN í því augnamiði að umkringja drottningu smátt þriðju í suður. Rökrétt, en afar óheppilegt í þessu tilfelli þar eð suður átti níuna með drottningunni. Tíu slagir.