Fyrir rúmum mánuði undirrituðu menningarmálaráðherra og útvarpsstjóri samning um starfsemi Ríkisútvarpsins til næstu ára þar sem segir meðal annars að unnið verði að því að „minnka umsvif Ríkisútvarpsins á samkeppnismarkaði, t.d. með frekari takmörkunum á birtingu viðskiptaboða og/eða með því að breyta eðli og umfangi auglýsingasölu“.
Viðskiptablaðið vakti í gær athygli á að skömmu áður hafði stjórn Rúv. samþykkt fjárhagsáætlun þessa árs á fundi sínum en þar er gert ráð fyrir 17,4% aukningu auglýsingatekna á þessu ári. Í sömu fundargerð segir að tekjur fyrstu tíu mánaða ársins 2023 hafi verið 129 milljónum króna yfir áætlun.
Tekjur Rúv. hafa farið vaxandi á undanförnum árum á sama tíma og einkareknir miðlar hafa almennt gefið eftir í samkeppninni og jafnvel tínt tölunni. Rúv. er hins vegar ekki í neinni hættu því að auk ört vaxandi auglýsingatekna er sífellt verið að hækka útvarpsgjaldið, ofan á þá sjálfvirku hækkun sem felst í fjölgun landsmanna. Í Viðskiptablaðinu kemur fram að auglýsingatekjur Rúv. hafi verið rétt ríflega 2 milljarðar árið 2021 en stefni samkvæmt fjárhagsáætlun í að fara yfir 3 milljarða á þessu ári.
Ríkisútvarpið fer með öðrum orðum sínu fram, alveg óháð lögum eða samningum við ráðherra. Slíkt er bara upp á punt að mati stofnunarinnar.
Til baka
Leita í greinasafni
Prenta grein