Andlát sex ára barns í Kópavogi er til rannsóknar hjá Lögreglunni á höfuðborgarsvæðinu. Tilkynning um málið barst embættinu um klukkan hálfátta í gærmorgun og hélt lögreglan þegar á vettvang, í íbúðarhús á Nýbýlavegi. Barnið var látið þegar lögreglu bar að garði.
RÚV greindi frá því í gær að kona væri í haldi lögreglu vegna málsins og að hún ætti að sæta geðmati. Eiríkur Valberg, lögreglufulltrúi hjá miðlægri rannsóknardeild Lögreglunnar á höfuðborgarsvæðinu, kvaðst þó ekki geta staðfest það í samtali við Morgunblaðið. Eiríkur sagði ekki frekari upplýsingar veittar að svo stöddu, enda málið á viðkvæmu stigi.