Jürgen Klopp lætur af störfum hjá enska knattspyrnufélaginu Liverpool…

Jürgen Klopp lætur af störfum hjá enska knattspyrnufélaginu Liverpool eftir tímabilið eins og flestum ætti að vera kunnugt. Missirinn er svo sannarlega mikill, sérstaklega fyrir stuðningsmenn Liverpool, en líka fyrir stuðningsmenn ensku úrvalsdeildarinnar í heild sinni.

Rafael Benítez, fyrrverandi stjóri Liverpool, greindi frá því á dögunum að það byggi meira að baki ákvörðun Klopps um að hætta með liðið en gefið hefur verið upp í fjölmiðlum.

Maður veltir því fyrir sér hvort Klopp hafi sjálfur verið að gefa vísbendingar um brotthvarf sitt þegar hann sagði við fjölmiðla að hann hefði meðal annars verið að ræða um möguleg kaup næsta tímabils þegar hann áttaði sig á því að hann yrði mögulega ekki á Anfield á næstu leiktíð.

Það er ekkert launungarmál að Liverpool hefur ekki getað eða viljað kaupa alla þá leikmenn sem Klopp hefur viljað fá til félagsins. Ætli Þjóðverjinn sé orðinn þreyttur á því að þurfa að berja hausnum endalaust við steininn þegar kemur að leikmannastefnu félagsins?

Sem stuðningsmaður Liverpool hefur maður líka áhyggjur af því hvernig félagið ætlar að sækja bestu, eða frekar næstbestu, bitana á markaðnum, þegar Klopp er farinn.

Það er líka magnað hversu vel þýski stjórinn hefur gert með þá leikmenn sem hann hefur fengið til félagsins því margir þeirra voru kannski ekki beint í heimsklassa áður en þeir komu.

Kylian Mbappé kemur ekki til Liverpool ef Klopp verður ekki á Anfield, svo mikið er víst, og það verður þrautin þyngri að ráða nýjan stjóra, stjóra sem getur barist um Englandsmeistaratitilinn og getur líka lokkað til sín fremstu fótboltamenn heims.