Tíu íslenskir keppendur stóðu uppi sem Norðurlandameistarar þegar Norðurlandamót í tækvondó fór fram í Laugardalshöll samhliða Reykjavíkurleikunum á dögunum.
Keppendur frá öllum Norðurlöndunum mættu til leiks og eru þó nokkuð margir sem sitja hátt á heimsstigalistanum.
Samtals voru 233 keppendur skráðir til leiks og þar af 67 frá Íslandi. Keppt var í bardaga á laugardeginum og formum (tækni) á sunnudeginum.
A-landslið Íslands í bardaga, undir stjórn Gunnars Bratlis landsliðsþjálfara, vann með fullu húsi stiga. Íslenska liðið var lið mótsins á laugardeginum í bardaga en Finnar náðu þeim titli svo á sunnudeginum í formum.
Íslensku Norðurlandameistararnir eru Leo Anthony Speight og Ingibjörg Erla Grétarsdóttir úr Björk, Guðmundur Flóki Sigurjónsson, Anton Tristan Lira Atlason og Bryndís Eir Sigurjónsdóttir úr KR, Andri Sævar Arnarson, Amir Maron Ninir og Ylfa Var Jóhannsdóttir úr Keflavík og Arnar Bragason og Sigurjón Kári Eyjólfsson úr Aftureldingu.