Sjö sækjast eftir starfi fiskistofustjóra sem auglýst var 12. janúar síðastliðinn og mun matvælaráðherra skipa í embættið að undangengnu mati hæfnisnefndar, að þvi er segir í tilkynningu á vef Stjórnarráðsins.
Ögmundur H. Knútsson baðst lausnar frá störfum sem fiskistofustjóri frá og með 15. janúar sl. og Elín Björg Ragnarsdóttir sviðstjóri veiðieftirlits gegnir starfinu þar til ráðningu lýkur. Er hún meðal umsækjenda um stöðuna.
Auk hennar sækja um Bergþór Bjarnason fjármálastjóri, Erna Jónsdóttir sviðstjóri, Fannar Karvel framkvæmdastjóri, Gísli Gíslason svæðisstjóri, Ólafur Unnar Kristjánsson framkvæmdastjóri og Robert Thorsteinsson viðskiptafræðingur.
Hæfnisnefnd metur hæfni umsækjenda, en í henni sitja Gylfi Dalmann Aðalsteinsson, Ragnhildur Hjaltadóttir og Eyþór Björnsson fyrrverandi fiskistofustjóri.