Héraðsdómur Reykjavíkur hefur dæmt karlmann á þrítugsaldri í sex mánaða skilorðsbundið fangelsi fyrir að hafa í nóvember árið 2021 farið grímuklæddur og vopnaður hnífi inn á pítsustað í Grafarvogi í þeim tilgangi að komast yfir fjármuni staðarins.
Fram kemur í ákæru að maðurinn hafi farið rakleiðis inn fyrir afgreiðsluborðið og opnað sjóðsvél staðarins, þaðan sem hann tók um 18 þúsund krónur í reiðufé. Þegar starfsfólk staðarins varð mannsins vart ógnaði hann því með hnífnum og sagði eitthvað á þá leið að hann yrði að gera þetta, en maðurinn var fyrrverandi starfsmaður staðarins. Hann hljóp í kjölfarið út af staðnum en missti farsíma og lykil og sneri við til að vitja munanna. Eftir orðaskipti reyndi starfsmaður, sem var kona, að ná taki á manninum, sem brást við með því að ógna henni með því að sveifla hnífnum að henni. Í kjölfarið hljóp maðurinn á brott og annar starfsmaður á eftir honum í félagi við vegfaranda og tókst þeim að yfirbuga manninn og halda honum uns lögregla kom á vettvang og handtók hann
Fram kemur í dómi héraðsdóms að maðurinn, sem hefur ekki gerst áður sekur um ofbeldisbrot, játaði skýlaust brot sín. „Ákærði talaði máli sínu fyrir dóminum. Hann leitaði sér aðstoðar eftir atvikið og fór í meðferð vegna fíknar sinnar [...], fyrst á Íslandi og síðan erlendis. Hann byggi nú erlendis, væri í vinnu og væri laus við lyfin. Kvaðst ákærði vilja axla ábyrgð á verknaðinum sem hann iðraðist mjög,“ segir í dómi héraðsdóms.
Dómurinn var skilorðsbundinn, m.a. með tilliti til ungs aldurs mannsins og þess að langt var um liðið frá atvikum, en ákæra var gefin út um tveimur árum síðar.
Til baka
Leita í greinasafni
Prenta grein