Taka tillit til jarðhræringa

Hjördís Ýr Johnson, formaður skipulagsráðs Kópavogs, segir verða tekið tillit til jarðhræringa við mat á hugmyndum um uppbyggingu við Gunnarshólma.

Þá minnir hún á að í frumathugun á Gunnarshólmasvæðinu hafi verið horft til náttúruvár.

„Litið var meðal annars til skýrslu frá Jarðvísindastofnun Háskóla Íslands um jarðhræringar frá 2021 sem tekur m.a. til Gunnarshólma,“ segir Hjördís.

Bæjarráð Kópavogs hefur samþykkt að vísa áfram til samþykktar bæjarstjórnar drögum að viljayfirlýsingu við Aflvaka Þróunarfélag um uppbyggingu 5.000 íbúða á jörðinni Gunnarshólma. Verður hún tekin fyrir á fundi bæjarstjórnar Kópavogs á þriðjudag.

Jörðin Gunnarshólmi er norðan við Suðurlandsveg, skammt austan við Hólmsheiði og Rauðavatn. Svæðið er utan núverandi vaxtarmarka höfuðborgarsvæðisins en fram kemur á vef Kópavogsbæjar að farið verði í viðræður við nágrannasveitarfélögin um breytingu á þeim. Jafnframt er jörðin nærri vatnsverndarsvæði.

Varað við náttúrúvá

Rætt var við Árna Hjartarson jarðfræðing í Morgunblaðinu í fyrradag, en hann taldi rétt að hafa aukna eldvirkni í huga þegar áform um byggð við Elliðavatn og Rauðavatn, þar með talið austur af vatninu, væru metin. Árni hefur áður fjallað um náttúruvá á höfuðborgarsvæðinu, en þau mál hafa fengið aukið vægi eftir eldsumbrotin á Reykjanesskaga að undanförnu.

Hjördís segir Kópavogsbæ munu horfa til margra þátta við mat á hugmyndum um byggð við Gunnarshólma, þar á meðal áhættumats vegna hugsanlegra jarðhræringa.

„Það þarf að taka þetta til greina, sem og vatnsverndina og náttúruleg vaxtarmörk höfuðborgarsvæðisins. Þessi jörð er utan vaxtarmarka, þannig að það er ýmislegt sem þarf að skoða áður en áfram er haldið og út á það gengur þessi viljayfirlýsing [við Aflvaka]. Þessi mál verða því skoðuð í þaula og hvort þetta er yfirhöfuð gerlegt út frá vatnsvernd.“

Hvað sérðu fyrir þér að þessi vinna muni taka langan tíma?

„Við gerum ráð fyrir að öll skipulagsvinnan í kringum þetta taki að minnsta kosti 1-2 ár. Það eru margar spurningar sem þarf að svara varðandi vaxtarmörkin, vatnsverndina og allt hitt. Það tekur tíma að fá öll tilskilin leyfi og koma þessu öllu í gegn í skipulaginu,“ segir Hjördís Ýr.