Breiðfylking stærstu stéttarfélaga landsins hefur slitið kjaraviðræðum sínum við Samtök atvinnulífsins (SA). Tilkynning þess efnis barst í gærkvöldi. Vilhjálmur Birgisson formaður Starfsgreinasambandsins segir vonbrigði að hafa þurft að slíta viðræðunum. Breiðfylkingin hafi hins vegar neyðst til þess.
Málið strandar að hans sögn á ákvæði sem SA vilji ekki hafa inni í samningunum. Kveður það á um að hægt verði að slíta samningum ef verðbólga mælist yfir 7% á samningstímanum og ef vextir lækka ekki um 2,5%.
Í tilkynningu frá SA sem send var út í gærkvöldi segir að SA telji mikilvægt að forsenduákvæði sem samið er um valdi því ekki að stöðugleikinn ríki einungis til skamms tíma.
„Samningsmarkmið í þeim kjaraviðræðum sem Samtök atvinnulífsins hafa átt við breiðfylkingu stéttarfélaga á almennum vinnumarkaði að undanförnu hefur verið að gera langtímasamninga sem skapi skilyrði fyrir minni verðbólgu og lægri vexti,“ segir í tilkynningunni.
Segir í tilkynningunni að SA séu reiðubúin sem fyrr að halda samtalinu áfram. Markmiðið sé áfram að stuðla að aukinni sátt. » 2