„Við höldum okkar striki,“ segir Kristján Þórður Snæbjarnarson, formaður Rafiðnaðarsambandsins, um kjaraviðræður Fagfélaganna og Samtaka atvinnulífsins. Hann segir viðræðuslit milli breiðfylkingarinnar og SA ekki hafa áhrif á viðræður þeirra við SA með beinum hætti.
Haldinn var sáttafundur í deilu Fagfélaganna og SA í fyrradag, vinnufundir voru í gær og fyrirhugaður er formlegur sáttafundur hjá ríkissáttasemjara í dag.
Ágreiningur um forsenduákvæði samninga varð til þess að upp úr slitnaði á milli breiðfylkingarinnar og SA. Spurður hvort sambærilegar kröfur séu á borðinu í viðræðum Fagfélaganna segir Kristján að langtímakjarasamningar þurfi að innihalda forsenduákvæði til að tryggja hagsmuni félagsmanna og krafa um það sé í kröfugerðinni.
Skammtímasamningur ef ekki næst breið samstaða
Þórarinn Eyfjörð formaður Sameykis, segir í grein í nýútkomnu tímariti félagsins að ef breið samstaða skapist á vinnumarkaðnum um sameiginlegar kröfur opnist möguleiki fyrir langtímasamninga. Til að svo megi verða sé nauðsynlegt að í samningum séu haldgóð forsenduákvæði (rauð strik) á tilgreindum tímasetningum. „Ef ekki næst breið samstaða aðila þá gerir Sameyki ráð fyrir að skammtímasamningar verði raunin,“ skrifar hann. Meðal þess sem krafist sé á hendur launagreiðendum séu breytingar á vinnutíma í vaktavinnu, stór skref varðandi jöfnun launa á milli markaða, launaskriðstrygging o.fl.
„Formlegar kjaraviðræður Visku eru ekki hafnar, enda renna samningar okkar við opinbera launagreiðendur ekki út fyrr en 31. mars næstkomandi. Undirbúningur kjaraviðræðnanna er þó langt á veg kominn hjá félaginu hvað varðar kröfugerð og fleira,“ segir Brynhildur Heiðar- og Ómarsdóttir formaður Visku. Formaður BHM hafi haft viðræðuumboð til að taka þátt í samtali um kröfur og áherslur í komandi kjarasamningum við önnur heildarsamtök, einstök stéttarfélög og launagreiðendur. Samningsumboð fyrir Visku liggi þó enn hjá félaginu sjálfu.
omfr@mbl.is
Til baka
Leita í greinasafni
Prenta grein