Hildur Sverrisdóttir þingflokksformaður Sjálfstæðisflokksins segir nauðsynlegt að víkja til hliðar þeim séríslensku reglum sem hér gildi um móttöku hælisleitenda og augljóst að samræma þurfi þær því sem gerist annars staðar á Norðurlöndum.
Þetta kemur fram í viðtali við hana í Dagmálum, sem opið er öllum áskrifendum Morgunblaðsins.
Hún segir að hinar séríslensku reglur hafi orðið til þess fleiri leiti hingað en ella og að á daginn hafi komið að Ísland ráði ekki við þá ásókn. Hún nefnir t.d. að hér sé vikið frá Dyflinnarreglunni um að fjalla eigi um hælisbeiðni í því landi sem fólk fyrst komi til, en eins hafi fólki verið veitt vernd hér þrátt fyrir að hafa þegar verið veitt vernd annars staðar.
Í þættinum er einnig fjallað um frumvarp hennar um breytingu á meðferð sakamála, svo rannsóknir dragist ekki úr hömlu. andres@mbl.is