Stjarnan og Afturelding unnu bæði góða sigra í botnbaráttu úrvalsdeildar kvenna í handknattleik á laugardag.
Stjarnan heimsótti botnlið KA/Þórs á Akureyri og hafði betur, 27:25.
Eva Björk Davíðsdóttir fór fyrir Stjörnunni er hún skoraði átta mörk. Darija Zecevic átti stórleik í marki liðsins, varði 18 skot og var með 43 prósent markvörslu.
Isabella Fraga og Nathalia Soares voru markahæstar í liði KA/Þórs með fimm mörk hvor.
Stjarnan er í 6. sæti með níu stig, fjórum stigum fyrir ofan KA/Þór á botninum.
Afturelding gerði þá frábæra ferð til Vestmannaeyja og lagði ÍBV að velli, 26:25.
Hildur Lilja Jónsdóttir og Ragnhildur Hjartardóttir voru markahæstar í liði Aftureldingar með fimm mörk hvor. Saga Sif Gísladóttir fór á kostum í marki liðsins og varði 16 skot. Var hún með tæplega 46 prósent markvörslu.
Afturelding er áfram í 7. sæti en nú með átta stig, þremur stigum fyrir ofan KA/Þór.
Fram fékk Hauka í heimsókn í Úlfarsárdal og vann sterkan sigur, 23:19.
Berglind Þorsteinsdóttir og Harpa María Friðgeirsdóttir voru markahæstar í leiknum með sex mörk hvor fyrir Fram. Andrea Gunnlaugsdóttir varði 14 skot í markinu.
Margrét Einarsdóttir varði 16 skot í marki Hauka.
Fram fór með sigrinum upp fyrir Hauka og er með 26 stig í 2. sæti líkt og Haukar sæti neðar.