Jón Jens Kristjánsson skrifar á Boðnarmjöð: Ronaldo-fjölskyldan brjáluð eftir að rassinn var tekinn af henni. Sjáðu mistökin sem blaðið gerði. Sjá DV:
Yfir ljósmyndum verður oft lítill klassi
um líkamsparta er gjarnan spurt
illt er að deila einum rassi
ef hann er síðan tekinn burt.
Davíð Hjálmar Haraldsson leggur fyrir vísnagátu til skemmtunar: Eitt lausnarorð en útskýrið mismunandi merkingu í hverri línu:
Feitt og þunnt og fölt og dökkt.
Forvitin því hnika til.
Iðnin fær á flótta stökkt.
Fá þá öll að gera skil.
Limra eftir Gunnar J. Straumland:
Gunnar var glaðsinna maður,
grunnhygginn, hraður en staður,
unni að kíma
og kunni að ríma
þunnildisþvaður og blaður.
Eyjólfur Ó. Eyjólfsson skrifar: Í gærmorgun fylgdist ég með því í sjónvarpinu hvernig hraunið læddist að litlum ljósastaur og lukti hann logagreipum. Þegar ljós staursins slokknaði skyndilega greip mig undarlegur tregi:
Þótt staurinn í storminum frjósi
stendur hann hampandi ljósi
um heldimma nótt
hugdjarfur þótt
hlutskipti annað hann kjósi.
Um björgun er fánýtt að fjasa
er forlögin við manni blasa
og veikur og meyr
hann visnar og deyr
eins og varnarlaust smábarn á Gasa.
Limra eftir Helga Ingólfsson:
Í húsinu handan við Jörva
var haft eftir bóndanum Tjörva:
„Mitt sjálfdauða ket
sem krásir ég et
með klípu af þránuðum Smjörva.“
Limra eftir Jón Ingvar Jónsson:
Er Friðrekur jarðskjálftann fann
á flótta þá óðara rann
og barðist á millum
bóka úr hillum
uns Biblían rotaði hann.
Eyjólfur Óskar Eyjólfsson yrkir: Hugsanir og þras:
„Ég þrasa og þess vegna er ég
því ég þoli' ekki heimsku það sver ég“
mælti Hallbjörn en þá
segir Hildibjörg Gná:
„Ég hugsa og þess vegna fer ég.“