Kristján Jónsson
kris@mbl.is
Hraunflæðið úr síðasta eldgosi á Reykjanesskaganum 7.-8. febrúar er næstmest að flatarmáli þegar eldgosin sex sem urðu á svæðinu frá árinu 2021 eru skoðuð. Uppstreymi kviku reyndist mun meira en virtist við fyrstu athugun.
Hraunið rann til vesturs en ekki í austur og þar er töluvert meiri halli í landinu niður á við. Myndaðist þá farvegur nokkuð fljótt og hraunið fór hratt yfir.
Ekki munar ýkja miklu á flatarmáli hraunsins í Fagradalsfjalli 2021 og febrúargosinu í Sundhnúkagígaröðinni á þessu ári en mikill munur er hins vegar á rúmmálinu.
Þetta má sjá í tölum sem komu út úr mælingum nokkrum dögum eftir gos. Mælingarnar eru samstarfsverkefni Landmælinga, Náttúrufræðistofnunar, Jarðvísindastofnunar Háskóla Íslands og Veðurstofunnar.
16% af því sem var '21-'23
Á kortinu hér fyrir ofan má sjá tölurnar yfir flatarmál og rúmmál hraunflæðis í eldgosum undanfarinna ára.
Eldgosið sem varð um miðjan janúar við Grindavík var langminnst síðustu eldgosa á Íslandi en olli skemmdum sem eru sambærilegar við það sem síðasta gos í febrúar olli.
Það sem kom upp í þremur gosum á Reykjanesskaganum í desember, janúar og febrúar er um 16% af því sem kom upp í eldgosunum þremur á árunum 2021-2023.