Gunnar Jakobsson varaseðlabankastjóri fjármálastöðugleika vildi lækka stýrivexti Seðlabankans um 0,25 prósentustig fyrir vaxtaákvörðun bankans í byrjun febrúar. Aðrir nefndarmenn kusu með tillögu Ásgeirs Jónssonar seðlabankastjóra og formanns nefndarinnar um að halda vöxtum óbreyttum.
Þetta kemur fram í fundargerð peningastefnunefndar sem birt var í gær. Stýrivextir eru nú 9,25% en þetta var þriðja vaxtaákvörðun nefndarinnar í röð þar sem ákveðið var að halda vöxtum óbreyttum. Þetta er ekki í fyrsta sinn sem Gunnar greiðir atkvæði gegn tillögu seðlabankastjóra en hann kaus í fyrra tvisvar gegn tillögum um hækkun vaxta.
Í fundargerðinni kemur fram að Gunnar taldi að aðhald peningastefnunnar væri nægjanlegt enda hefði dregið úr umsvifum í þjóðarbúskapnum. Einnig fæli nýleg þróun efnahagsmála, verðbólguhorfa og raunvaxta í sér vísbendingar um að komið væri að því að lækka vexti. Hann benti jafnframt á að raunvextir bankans hefðu ekki verið hærri síðan 2012 og allt benti til að þeir myndu hækka töluvert til viðbótar á næstu mánuðum. Rétt væri því að hefja lækkunarferlið en í litlum skrefum í ljósi þeirrar óvissu sem væri til staðar.
Í fundargerðinni segir jafnframt að nefndin hafi sammælast um að áhrif af auknu aðhaldi peningastefnunnar væru að koma hratt fram og líklega væri farið að nálgast vendipunkt væri enn þörf á háum raunvöxtum í hagkerfinu. Nefndarmenn töldu ánægjulegt að áhrif peningastefnunnar kæmu æ skýrar fram og að verðbólguhorfur hefðu batnað. Þó vildi nefndin sjá skýrari merki um hjöðnun verðbólgunnar, þar sem enn væri talsverð óvissa um marga lykilþætti í efnahagslífinu og verðbólga væri enn mikil.