Gátan er sem endranær eftir Pál Jónasson Hlíð:
Sigtar möl í margan veg,
markar sumarkomu.
Gagnrýnd bygging, glæsileg,
á gripinn seinna spila ég.
Þórunn Erla Sighvats á þessa lausn:
Síuharpa sigtar möl,
í hörpu sumar kviknar.
Heimslista í Hörpu völ,
af hörputónum viknar.
Úlfar Guðmundsson svarar:
Vegir fengu valda stærð.
Vorsins engja ilminn færð.
Á hljóma lengi hlustað fæ.
Hörpu strengi glaður slæ.
Guðrún B. leysir gátuna:
Malarhörpur megadýrar.
Sé mánuð, hörpu, til þín stika.
Í Hörpu tónar hljóma skýrar,
á hörpu leikur þekkt Monika.
Sigmar Ingason á þessa lausn:
Hörpuð mölin hentar best í veginn
HARPAN er bara falleg öðrum megin
Vorbirtan á Hörpu vekur gleði í sál
Sæll því henni fagna ég um sumarmál
Á hörpuhljóma hlíði sæll og feginn.
Harpa Hjarðarfelli sendi „fljótaskriftarlausn“:
Mölina malar harpa.
Mánuðurinn Harpa.
Glæst og glerjuð Harpa.
Gripurinn er harpa.
Sjálfur skýrir Páll gátuna svona:
Malarharpa marga sigtar grús
markar Harpa sumarkomu fús.
Harpa er líka gagnrýnt glæsihús,
á gamla hörpu spila ég minn blús.
Síðan er ný gáta eftir Pál:
Á hafi mikill háski er,
hendir líka ökumann,
í buxum aldrei bein hjá mér,
bara vísupart ég kann.
Björn Ingólfsson skrifar í Boðnarmjöð: Þegar ég fletti upp í Fésbók í morgun dúkkaði upp orðið VALTARI með stóru letri. Ég skoðaði það ekkert nánar og þessi status hvarf í kraðakið. En á morgungöngunni spruttu upp af þessu orði tvær guðhræddar systur vel við aldur:
Lesefni systra er Saltari
á svolitlu altari.
Önnur er helmingi haltari
en hin sem er valtari.