Manchester er ljósblá

Manchester City vann verðskuldaðan heimasigur á grönnum sínum í Manchester United, 3:1, í ensku úrvalsdeildinni í fótbolta í gær. City var með mikla yfirburði allan leikinn og var það algjörlega gegn gangi leiksins þegar Marcus Rashford kom United yfir á 8. mínútu með glæsilegu skoti í slána og inn.

Eftir markið spilaðist stór hluti leiksins á vallarhelmingi United og var aðeins spurning hvenær en ekki hvort ríkjandi meistararnir myndu jafna. Það gerði Phil Foden á 56. mínútu með öðru glæsilegu skoti. Englendingurinn ungi kom United svo yfir með sínu öðru marki á 80. mínútu.

Erling Haaland, sem átti eitt versta klúður tímabilsins í fyrri hálfleik, gulltryggði síðan sigurinn í uppbótartíma.

Þrátt fyrir að United hafi verið yfir í um 50 mínútur í leiknum, var City mikið sterkari aðilinn og er gríðarlegur gæðamunur á liðunum.

City er nú með 62 stig, einu stigi á eftir toppliði Liverpool. United er í sjötta með 44 stig eftir tvö töp í röð.

Núnez hetja Liverpool

City væri komið á toppinn með sigrinum í gær, ef ekki hefði verið fyrir sigurmark Darwins Núnez fyrir Liverpool á níundu mínútu uppbótartímans í útileik gegn Nottingham Forest. Stefndi allt í markalaust jafntefli, en sá úrúgvæski skallaði boltann í netið á allra síðustu stundu og Liverpool-menn fögnuðu vel.

Liverpool var nokkuð frá sínu besta en tókst engu að síður að knýja fram sigur í lokin, sigur sem gæti reynst mjög mikilvægur, með City andandi ofan í hálsmálið á sér.

Það verður sannkölluð veisla þegar liðin mætast á Anfield um næstu helgi.

Liverpool er með 63 stig, einu stigi á undan Manchester City og fimm á undan Arsenal en Arsenal á leik til góða gegn botnliði Sheffield United á útivelli í kvöld.

Hræðileg helgi fyrir United

Var um hræðilega helgi að ræða fyrir United, því Aston Villa og Tottenham unnu einnig og juku forskotið á Manchester-liðið.

Villa vann sigur á Luton á útivelli, 3:2, þar sem Ollie Watkins gerði tvö mörk og Lucas Digne skoraði sigurmarkið í lokin.

Tottenham vann endurkomusigur á Crystal Palace, 3:1. Eberechi Eze kom Palace yfir með glæsilegri aukaspyrnu en þeir Timo Werner, Cristian Romero og Heung-min Son svöruðu fyrir Tottenham-menn.

Villa er í fjórða sæti með 55 stig, Tottenham í fimmta með 50 og United í sjötta með 44.

Fallbaráttan breyttist lítið því liðin í neðstu sætunum töpuðu öll. Staðan er orðin býsna erfið fyrir Burnley eftir fjórða tapið í röð, en Burnley-menn máttu þola tap gegn Bournemouth, 2:0, á heimavelli. Jóhann Berg Guðmundsson kom inn á hjá Burnley í lokin, en liðið er áfram níu stigum frá öruggu sæti.