Ríkisstyrktar rangfærslur Heimildarinnar

Forsvarsmenn Heimildarinnar hafa einhverra hluta vegna fundið hjá sér þörf til að reyna að vega að starfsheiðri mínum með því að birta á forsíðu blaðsins sem kom út 1. mars 2024 fyrirsögn þar sem segir „Vann fyrir Ríkiskaup og keypti varðskip“.

Á bls. 4 í blaðinu og á vefsíðu miðilsins er síðan fimbulfambað um kaup félags í minni eigu á varðskipunum Ægi og Tý um mitt ár 2022 þar sem reynt er að gera kaupin tortryggileg, m.a. þar sem ég hafi á sama tíma verið formaður smíðanefndar vegna smíði nýs hafrannsóknaskips.

Hið rétta er að ég hef aldrei unnið fyrir Ríkiskaup. Hins vegar unnu Ríkiskaup að undirbúningi útboðs fyrir smíði hafrannsóknaskipsins á þeim tíma sem ég gegndi störfum sem formaður smíðanefndarinnar, en ég lét af þeim störfum að eigin ósk um áramótin 2020/2021.

Mér er ekki kunnugt um hvers vegna Heimildin reynir að koma á mig höggi, en tel að almannafé væri betur varið með öðrum hætti en að ríkið styrki útgáfu sem þessa.