Telja mjög brýnt að fá umboðsmann

Kraftur, stuðningsfélag ungs fólks sem greinst hefur með krabbamein og aðstandendur þess, hefur fjölmörg dæmi þar sem félagsmenn þess hefðu nauðsynlega þurft á aðstoð umboðsmanns sjúklinga að halda. Þetta kemur fram í umsögn Krafts til velferðarnefndar Alþingis um þingsályktunartillögu Halldóru Mogensen og 15 annarra þingmanna um að komið verði á fót embætti umboðsmanns sjúklinga.

Fékk ranga greiningu

Erindi Krafts fylgja tvö dæmi úr starfseminni til að veita þingmönnum innsýn í reynsluheim sjúklinga.

Sagt er frá ungri konu sem greindist með brjóstakrabbamein en er sögð hafa verið ranglega greind og því ekki fengið viðeigandi meðferð fyrr en alltof seint. „Þegar það kom upp var sjúkdómurinn of langt genginn til að hægt væri að bjarga lífi hennar,“ segir í umsögninni. Konan hafi sjálf ekki haft burði með langt gengið krabbamein til þess að aðhafast nokkuð og segir í umsögninni að eftir andlátið hafi fjölskyldu hennar vantað ráðgjöf um hvert þau gætu snúið sér þar sem um dýrkeypt mistök hafi verið að ræða sem hafi kostað konuna lífið.

Í öðru dæmi er sagt frá ungri félagskonu Krafts sem greind var með heilaæxli og hafði samband við félagið þar sem hún var ráðalaus.

„Læknirinn hennar hafði neitað henni um myndgreiningu á höfði eftir ítrekaðar óskir hennar um að framkvæma viðeigandi rannsókn þar sem hún var byrjuð að sýna einkenni sem upphaflega komu fram við greiningu á sjúkdómi hennar. Læknir stúlkunnar var yfirlæknir og því átti hún í miklum erfiðleikum með að fá álit annars læknis innan spítalans þar sem þeir störfuðu allir undir viðkomandi lækni. Þegar hún leitaði til spítalans höfðu þeir engin svör fyrir hana og var hún í mikilli angist og ráðalaus hvernig hún ætti að snúa sér í þessu,“ segir í umsögn Krafts.

Að mati forsvarsmanna Krafts hefði umboðsmaður sjúklinga í báðum þessum tilvikum verið nauðsynlegur.

Þarf að vera sjálfstæður og með yfirgripsmikla þekkingu

„Kraftur hefur fjölmörg önnur dæmi þar sem félagsmenn okkar hefðu nauðsynlega þurft á umboðsmanni sjúklinga að halda. Þar sem hann gæti bent heilbrigðisyfirvöldum á sjónarmið sjúklingsins, miðlað málum og lagt til úrbætur í heilbrigðiskerfinu með hagsmuni sjúklinganna að leiðarljósi. Í þessu veigamikla hluverki leggur Kraftur áherslu á að umboðsmaður sjúklinga sé sjálfstæður aðili sem býr yfir yfirgripsmikilli þekkingu á heilbrigðiskerfinu,“ segir ennfremur í umsögn félagsins.

Er lögð áhersla á að það sé mikið hagsmunamál félagsmanna Krafts að á Íslandi starfi aðili sem gæti hagsmuna sjúklinga.