Norður
♠ 9842
♥ 109863
♦ --
♣ 6543
Vestur
♠ G
♥ ÁKG74
♦ ÁD96
♣ 972
Austur
♠ KD10765
♥ D2
♦ 873
♣ D8
Suður
♠ Á3
♥ 5
♦ KG10542
♣ ÁKG10
Suður spilar 3♦ redoblaða.
Gölturinn setti fram þá kenningu í þætti gærdagsins að grundvallarmunur væri á eiginlegum mistökum við spilaborðið og óheppilegum ákvörðunum: „Það má læra af mistökum og forðast þau í framtíðinni, en sumar ákvarðanir eru þess eðlis að maður veit aldrei hvort þær leiði til góðs og ills.“
Gölturinn hafði fundið annað dæmi úr pólsku meistaradeildinni til að varpa ljósi á kenningu sína: Austur opnar á multi 2♦ (veikt með hálit) og suður segir 3♦. Vestur sleikir út um og doblar og norður á leikinn. „Á hann að passa eins og ræfill eða reyna björgunaraðgerðir með redobli?“
Annar pólski meistarinn passaði og gaf út 200 fyrir einn niður. Hinn reyndi að beina makker annað með SOS-redobli, en suður sat sem fastast og fór líka einn niður: 400 út. „Ég veit, satt að segja, ekki hvað best er að gera,“ játaði Gölturinn sorgmæddur.