Hvar kreppir skórinn?

Soroptimistasamband Íslands er hluti af alheimshreyfingu kvenna og eru markmið hreyfingarinnar m.a. að vinna að bættri stöðu kvenna, jafnrétti, framförum og friði í heiminum.

Alþjóðlegur baráttudagur kvenna er 8. mars og Soroptimistar um allan heim munu vekja athygli á baráttunni fyrir jafnrétti kynjanna á þessum degi. Slagorð okkar þennan dag er Hvar kreppir skórinn? Víða kreppir skórinn í okkar samfélagi og Soroptimistasystur ganga saman til góðra verka til að vinna að því að styrkja og efla konur. Verkefni Soroptimista á Íslandi miðast m.a. að því að styðja við menntun kvenna sem búa við erfiðar aðstæður, berjast gegn ofbeldi gagnvart konum og valdefla konur í viðkvæmri stöðu.

Í tilefni dagsins hefur verið skipulagður hádegisfundur á Akureyri í samvinnu Soroptimistaklúbbs Akureyrar og fleiri klúbba á svæðinu. Konur á átakasvæðum er umfjöllunarefni fundarins. Soroptimistar á Íslandi hafa undanfarin ár stutt við konur á átakasvæðum í samvinnu við Evrópusamband Soroptimista.

Norrænir Soroptimistar vinna saman að markmiðum sínum með því að styrkja ungar stúlkur til að fara á leiðtoganámskeið og skiptast löndin á að skipuleggja námskeiðið. Íslenskar systur héldu leiðtoganámskeið á Bifröst fyrir tveimur árum og þótti það takast mjög vel.

Mikilvægur þáttur í stuðningi íslenskra Soroptimista við konur er að styrkja þjónustumiðstöðvar fyrir þolendur ofbeldis. Soroptimistar hafa á undanförnum árum veitt styrki til þolendamiðstöðvanna Bjarkarhlíðar í Reykjavík, Bjarmahlíðar á Akureyri og Sigurhæða á Selfossi. Og núna nær þjónusta við þolendur ofbeldis til kvenna um allt land.