Fjármálaráðherra Kostnaðurinn gæti orðið um 15 milljarðar.
Fjármálaráðherra Kostnaðurinn gæti orðið um 15 milljarðar. — Morgunblaðið/Kristinn Magnússon
Bygging nýrrar þjóðarhallar er forgangsfjárfesting af hálfu hins opinbera í samstarfi við Reykjavíkurborg sem fjármagnar sinn hluta, segir Þórdís Kolbrún R. Gylfadóttir fjármálaráðherra í samtali við Morgunblaðið en í gær var haldinn blaðamannafundur vegna málsins

Klara Ósk Kristinsdóttir

klaraosk@mbl.is

Bygging nýrrar þjóðarhallar er forgangsfjárfesting af hálfu hins opinbera í samstarfi við Reykjavíkurborg sem fjármagnar sinn hluta, segir Þórdís Kolbrún R. Gylfadóttir fjármálaráðherra í samtali við Morgunblaðið en í gær var haldinn blaðamannafundur vegna málsins.

Ráðgert er að ný þjóðarhöll verði tekin í notkun á árunum 2027 til 2028 og kostnaður við verkefnið verði um 15 milljarðar króna en höllin á að taka 8.600 manns í sæti.

„Við erum með í öllum gildandi áætlunum fjármagn sem á að nýta í opinberar fjárfestingar og opinberar fjárfestingar eru bara hluti af því hvernig þú stýrir efnahagsmálum. Spurningin er í hvaða opinberu fjárfestingar á að fara á hverjum tíma,“ segir Þórdís þegar hún er spurð hvernig fjármagna eigi byggingu nýrrar þjóðarhallar.

Þórdís segir ríkisstjórnina hafa sammælst um að þjóðarhöll sé forgangsverkefni af hálfu hins opinbera, sem þýði einfaldlega að þeir milljarðar sem fara í uppbyggingu þjóðarhallar fari ekki í aðrar opinberar fjárfestingar. „Við erum með ákveðin verkefni inni sem þarf ýmist að hliðra til eða færa, til þess að forgangsraða í þágu þessa.“

Engin höll á Íslandi stenst kröfur alþjóðlegra íþróttasambanda en Laugardalshöllin er á undanþágu.

Höf.: Klara Ósk Kristinsdóttir