Vilja nýtt íbúðasvæði í Úlfarsárdal

„Þetta er ánægjuleg stefnubreyting hjá Reykjavíkurborg og mikilvægt að sú kyrrstaða í húsnæðismálum sem vinstri meirihlutinn í borginni hefur viðhaldið undanfarin ár verði rofin, ekki síst í ljósi þess mikla húsnæðisskorts sem ríkir á höfuðborgarsvæðinu,“ segir Kjartan Magnússon, borgarfulltrúi Sjálfstæðisflokksins, í samtali við Morgunblaðið.

Til þeirra tíðinda dró á fundi borgarstjórnar sl. þriðjudag að tillögu sjálfstæðismanna um aukna uppbyggingu í Úlfarsárdal var vel tekið og var samþykkt með öllum greiddum atkvæðum gegn einu að vísa henni til átakshóps um húsnæðisuppbyggingu í borginni. Það var borgarstjóri sem lagði til þá málsmeðferð, en borgarfulltrúi Vinstri grænna var því einn andvígur.

Samþykktin lýtur að því að hafist verði handa við skipulagningu íbúðarsvæðis við Halla og í Hamrahlíðalöndum í Úlfarsárdal og byggt verði á samþykktu deiliskipulagi fyrir svæðið frá árinu 2007 sem verði uppfært eftir þörfum. Fela á umhverfis- og skipulagssviði að endurskoða gildandi deiliskipulag og annast aðra skipulagsvinnu.

„Það er mikill skortur á íbúðarhúsnæði á höfuðborgarsvæðinu og brýnt að skoðaðar verði allar leiðir til að auka lóðaframboð fyrir íbúðarhúsnæði. Reykjavíkurborg á mikið land sem auðvelt er að skipuleggja fyrir íbúðarbyggð með skömmum fyrirvara. Borgin getur brugðist myndarlega við því erfiða ástandi sem ríkir á húsnæðismarkaði og á að gera það án tafar. Stóraukið framboð lóða fyrir íbúðarhúsnæði yrði mikilvægt framlag til lausnar húsnæðisvandans sem er nauðsynlegt að bregðast við, enda um bráðavanda að ræða,“ segir Kjartan.

Kjartan segir Úlfarsárdal mjög ásættanlegan kost í þessu tilliti. Staðsetningin sé góð innan borgarlandsins og henti vel til uppbyggingar. Væntanlegt byggingarland er í 55-80 metra hæð yfir sjávarmáli, svipað og Neðra-Breiðholt. Svæðið segir hann vera umlukið vinsælum útivistarsvæðum og í hverfinu margir innviðir þegar til staðar, sem nýtast muni hinni nýju byggð, svo sem íþróttahús, sundlaug og fleira.

Hann bendir á að nú búi um 8.500 manns í Grafarholti og Úlfarsárdal og með góðu móti sé unnt að byggja hverfi fyrir 3 til 4 þúsund íbúa til viðbótar í Halla- og Hamrahlíðarlöndum.

„Uppbygging í Halla- og Hamrahlíðarlöndum er auðveldasta leiðin til að auka lóðaframboð í Reykjavík. Æskilegt er að nota tækifærið til að lækka verð á lóðum og lækka þannig húsnæðiskostnað, sem myndi koma fjölmörgum fjölskyldum til góða,“ segir Kjartan Magnússon.