Norður
♠ K7
♥ G109763
♦ 10873
♣ 6
Vestur
♠ 10632
♥ ÁK84
♦ ÁKG5
♣ 7
Austur
♠ ÁD985
♥ D
♦ D
♣ KDG932
Suður
♠ G4
♥ 52
♦ 9642
♣ Á10854
Suður spilar 3♦ doblaða.
Villtar hindranir eru ungra manna leikur og í því ljósi ber að skilja opnun suðurs á 3♣ á tíuna smátt fimmtu! Sá sem þar hélt á spilum var hinn tvítugi Dani Christian Lahrmann sem þegar hefur getið sér gott orð á alþjóðavísu þrátt fyrir ungan aldur. Spilið kom upp í dönsku deildakeppninni nýlega.
Vestur doblaði til úttektar og austur passaði glaður, enda hefði hann ekki skammast sín fyrir að opna sjálfur á 3♣ með sinn ágæta lauflit. Lahrmann fann skítalykt af málinu og flúði í „hliðarlitinn“, sagði 3♦ á tvistinn fjórða, sem vestur leyfði sér að dobla.
Með spaðaútspili er hægt að taka 3♦ 2000 niður – sagnhafi fær bara slag á laufásinn! Það þykir alltaf tíðindum sæta þegar spilarar ná þeim þroska að kljúfa 2000-múrinn, en vestur klúðraði vörninni með því að leggja niður tígulás og klessa drottninguna hjá makker sínum. Bara 1700.