Dæmi eru um að ferðamenn hafi orðið fyrir barðinu á vasaþjófum hér á landi að undanförnu og tapað háum fjárhæðum vegna þess. Ferðamálastofa varar nú við því að vasaþjófar séu á sveimi á helstu áfangastöðum landsins og því þurfi ferðaþjónustuaðilar að vera á varðbergi.
„Viljum við því hvetja ferðaþjónustuaðila til þess að brýna fyrir sínum viðskiptavinum að varast vasaþjófa og ganga þannig frá verðmætum að ekki sé auðvelt að nálgast þau,“ segir í tilkynningunni.
Ferðamálastofa veitir svo nokkur ráð varðandi það hvernig best sé að verjast vasaþjófum. Mikilvægt sé að standa alltaf vörð um verðmæti og vera meðvitaður um umhverfið á öllum tímum. Á það sérstaklega við ef einhver nálgast fólk og reynir að ná athygli þess. Fólk er hvatt til þess að loka öllum töskum og veskjum, hafa handtöskur fyrir framan sig á stöðum þar sem margir koma saman, aldrei geyma verðmæti í ytri vösum fatnaðar og eiga afrit af helstu persónugögnum.