Hrafn Breiðfjörð Ellertsson fæddist 19. apríl 2004. Hann lést af slysförum í Heiðmörk 7. mars 2024.

Foreldrar hans eru Ellert Kristinn Alexandersson, f. 30. júní 1969, og Sigríður Ottósdóttir, f. 25. maí 1971. Bræður hans eru Ottó Eiður, f. 3. nóvember 1991, Benedikt Breiðfjörð, f. 2. janúar 1996, unnusta hans er María Hafdís B. Albertsdóttir, f. 13. október 1997, og Kristófer Elí, f. 2. október 2002.

Hrafn ólst upp á Álftanesi og gekk í Álftanesskóla, þaðan fór hann í Tækniskólann í nám í vélvirkjun og var á námssamning hjá fyrirtækinu Vélafli ehf. í Hafnarfirði þegar hann lést, þar sem hann vann við viðhald og viðgerðir á stórum vinnuvélum um allt land.

Útför Hrafns Breiðfjörð fer fram frá Víðistaðakirkju í Hafnarfirði í dag, 18. mars 2024, klukkan 15.

Streymt er frá athöfninni á :

https://hljodx.is/streymi/hrafnbreidfjordellertsson/

Hve sárt ég sakna þín.

Ég sit við legstein þinn

og hugsa um horfna tíð,

hjartans vinur minn.

Sú staðreynd sturlar mig

að við sjáumst aldrei meir.

Þú gafst mér nýja sál,

sál sem eitt sinn deyr.

Ó, hve sár er dauði þinn,

þú varst eini vinur minn.

Einn ég stari í sortann inn

með sorgardögg á kinn.

Hve leið og laus við svör

er lífsins gönguför.

Við leyndardómsins dyr

deyja mennirnir.

Ó hve sár er dauði þinn,

þú varst eini vinur minn.

Einn ég stari í sortann inn

með sorgardögg á kinn.

(Sverrir Stormsker)

Fallegi engillinn okkar.

Mamma og pabbi.

Elsku besti Hrafn minn, heimurinn hrundi þegar ég fékk símtalið af fráfalli þínu. Þú varst alveg einstakur, náðir svo vel til allra, sama á hvaða aldri og hver það var. Þú hafðir svo góð áhrif og náðir alltaf að koma öllum í gott skap með nærveru þinni, sérstaklega með þessu fallega brosi og smitandi hlátri. Sama hvað var í gangi og hvenær, ef einhvern vantaði hjálp eða var í vandræðum þá komst þú alltaf hlaupandi.

Ég er ekki enn búin að ná að meðtaka það að þú sért farinn frá okkur og ég veit að það á eftir að vera erfitt og taka langan tíma að reyna að halda áfram með lífið án þín.

Við eigum svo ótal margar góðar minningar saman alveg frá því í leikskóla. Ég á eftir að sakna allra samverustundanna okkar og þá sérstaklega sumarbústaðaferðanna okkar sem voru fjölmargar, ýmist við tvö, í góðra vina hópi og þegar við fórum bara tvö með foreldrum þínum. Einnig allir ísbíltúrarnir sem oftar en ekki enduðu á að koma við á verkstæðinu þínu eða kíkja við til ömmu þinnar og afa á Álftanesinu. Ferðin norður sumarið 2022 á bíladaga er mér einnig ofarlega í huga ásamt því þegar þú komst mér á óvart síðustu páska og mættir vestur á „Aldrei fór ég suður“. Ég er svo ótrúlega þakklát fyrir allar fallegu og dýrmætu minningarnar okkar saman og mun ég varðveita þær að eilífu. Lagið okkar fallega hef ég spilað endalaust síðan þú kvaddir.

Engin orð geta lýst því hversu mikið ég elska þig og hversu mikið ég á eftir að sakna þín. Ég hugsa til þess hvernig framtíð okkar hefði orðið. Sagan okkar var rétt að byrja! Þú átt og munt alltaf eiga sérstakan stað í hjarta mínu, elsku besti Hrafn minn.

Hugur minn og hjarta er hjá yndislegu foreldrum þínum sem hafa verið mér svo góð síðustu daga, bræðrum, fjölskyldu og vinum sem eiga einnig um sárt að binda. Við munum halda minningu þinni hátt á lofti.

Þín að eilífu,

Birta María Huld K.

Með fáeinum orðum viljum við hjónin kveðja elsku Hrafn.

Birta María okkar og Hrafn áttu einstakt samband sem byggðist fyrst og fremst upp á góðri vináttu síðan í grunnskóla sem seinna hefur verið að þróast út í eitthvað meira, en allir sem þekktu vel til þeirra spáðu um að þarna væru framtíðarhjón á ferðinni. Gagnkvæm hrifning til hvort annars skein svo sannarlega frá þeim.

Hrafn var einstaklega skemmtilegur, fallegur og umfram allt góður strákur sem átti bjarta framtíð. Það var því mikið reiðislag að fá fregnirnar af ótímabæru andláti hans. Reynum við hjónin að halda vel utan um Birtu okkar á þessum erfiða tíma og hlúa að henni. Hugur okkar hefur þó dvalið hjá foreldrum Hrafns, bræðum, fjölskyldu og vinum. Missir þeirra er mikill og eru engin orð sem geta veitt huggun. Minning um góðan dreng mun lifa áfram.

Hvíldu í friði, elsku Hrafn.

Kveðja,

Íris Björk Árnadóttir og Kristján Jón Jónatansson.

Það er óraunverulegt að setjast niður og skrifa minningarorð um ungan efnilegan mann, góðan vin og traustan samstarfsfélaga. Fyrir tveimur árum bættist Hrafn í hóp okkar, þá aðeins yngri og örlítið óreyndari en alveg jafn kappsamur og daginn sem hann kvaddi okkur. Það fór ekkert á milli mála þegar hann þaut um fyrirtækið, hljóp upp stigann brosandi og tilbúinn í hvað sem er.

Fljótlega eftir að Hrafn hóf störf hjá Vélafli, breytti ég nafninu hans í símaskránni minni úr „Hrafn sonur Ella“ í „aðstoðarforstjórinn“. Símtölin voru alls konar en yfirleitt snérust þau um að drífa eitthvað í gegn, ná einhverju fram eða koma hlutum af stað. Þannig var að vinna með Hrafni, ekkert hangs, allt var gert af einlægni og yfirleitt töluverðu kappi, ávallt drifið áfram af velvilja. Engin orð ná utan um áfallið sem skall á okkur við fréttir af andláti Hrafns, á einu augabragði er allt breytt og við sem eftir stöndum erum tóm, harmi slegin.

Elsku Elli, Sigga, fjölskylda og vinir, við sendum ykkur okkar dýpstu samúðarkveðjur.

Kæri aðstoðarforstjóri, ekki veit ég hvað framtíðin ber í skauti sér, en ég veit þó að þín verður vel minnst og sárt saknað það sem eftir er. Takk fyrir samfylgdina, takk fyrir stuðið, kraftinn og áræðnina. Góða ferð, elsku vinur.

Hjálmar Kristinn
Helgason.

Hrafn.

Ég á erfitt með að fatta að þú sért farinn. Þegar ég hitti þig fyrst varstu bara einhver vitleysingur á rauðum Mustang og mér hefði aldrei dottið í hug að við yrðum eins náin og við urðum. Þú varst án efa með fallegustu sál sem ég hef hitt, þú varst yndislegur í alla staði og gerðir ekki flugu mein. Þú varst minn besti og traustasti vinur. Ég gat talað við þig um allt og ekkert í marga klukkutíma í einu og samtalið dó aldrei út. Ég elskaði hvað við vorum dugleg að facetime-a hvort annað upp úr þurru, alveg sama hvað klukkan var. Þú varst alltaf til staðar alveg, sama hvað, og alltaf til í að hjálpa. Ég verð að eilífu þakklát fyrir þig. Ég elska þig og sakna þín að eilífu.

Takk fyrir allt.

Camilla Mist S.
Andradóttir.