Ingólfur Ómar gaukaði að mér tveimur vísum á mánudag:
Hreiminn braga hlýna við
hljómar bagan slynga.
Ekki plagar andleysið
okkur Skagfirðinga.
Elska lipurt tungutak
og tónaflóðið þýða.
Hreyfir þó sér bregði á bak
best af öllum ríða.
Birtingaljóð og laust mál heitir góð bók sem kom í hendur mínar ekki alls fyrir löngu. Þar er margvíslegan fróðleik að finna sem fólkið frá Birtingaholti hefur skrifað. Sigurður Ágústsson bóndi þar gefur heilræði:
Láttu sífellt söngsins mál
seytla daga og nætur
inn í þína ungu sál
inn í hjartarætur.
Á leið í réttirnar í himinblíðu veðri orti hann:
Eftir þetta sólarsumar
sýnist ekkert hneykslismál
þó að frjálsir fjallagumar
fái sér eina réttarskál.
Og af sama toga:
Þó að eg sé aurafár
og oft í kröggum þéttum
þá skal ég alltaf eiga tár
í öllum Hrepparéttum.
Dóttir Sigurðar, Ásthildur húsfreyja í Birtingaholti, vaknaði snemma einn vormorgun, sólin var að koma upp. Hún hripaði niður í fljótheitum:
Í austri roðar árdagssól
svo undur fagurt himininn
og bjarma slær á hæð og hól.
Hvílík fegurð drottinn minn!
Öðru sinni kvað hún:
Það bætir geð og léttir lund
að leika sér að orðum,
að yrkja vísu á yndisstund
eins og skáldin forðum.
Jakob Aþanasíusson kvað:
Þar sem dökkleit þrenning býr
þrífst ei nokkur friður;
blessun guðs í burtu snýr;
bölvan rignir niður.
Enn kvað Jakob:
Hylur gæran sauðar svarta
soltinn úlf með geði þungu,
dúfu augu, höggorms hjarta,
hunangsvarir, eiturtungu.
Öfugmælavísan:
Hrafninn talar málið manns,
músin flýgur víða,
kettlingurinn kvað við dans,
kaplar skipin smíða.