Norður
♠ Á87
♥ D53
♦ Á643
♣ ÁD4
Vestur
♠ 542
♥ G
♦ DG87
♣ G9832
Austur
♠ K6
♥ K987642
♦ 10
♣ K107
Suður
♠ DG1093
♥ Á10
♦ K952
♣ 65
Suður spilar 4♠.
The Tricky Game heitir skemmtileg bók eftir Skotann Hugh Kelsey (1926-95) þar sem blekkingum og hálfsannleik er óspart beitt til að svíða af mótherjunum slagi í vonlitlum stöðum. Allt innan löglegra og siðlegra marka, auðvitað. Hér er austur tekinn í bakaríið – ekki einu sinni, heldur tvisvar. Norður opnaði á 1♦, austur stökk í 3♥, suður sagði 3♠ og norður hækkaði í 4♠. Hjartagosi út. Sagnhafi lét LÍTIÐ hjarta úr borði í fyrsta slag og tók svo misheppnaða svíningu í spaða. Austur taldi víst að suður hefði byrjað með hjartaásinn blankan og spilaði tígli til baka. Sagnhafi drap á tígulkóng, tók trompin og endaði í borði til að spila litlu hjarta undan drottningunni. Austur dúkkaði skiljanlega og tían átti slaginn. Til að bæta gráu ofan á svart ákvað sagnhafi að klára trompin og senda austur inn á hjarta í lokin til að spila upp í ÁD í laufi!