Norður
♠ 983
♥ K4
♦ D9842
♣ ÁD7
Vestur
♠ D62
♥ G10973
♦ G105
♣ 84
Austur
♠ K1075
♥ D65
♦ Á3
♣ 10962
Suður
♠ ÁG4
♥ Á82
♦ K76
♣ KG53
Suður spilar 3G.
Sú tækni í vörn að dúkka hnökralaust til að spara innkomu kallar á næmt innsæi og hraða hugsun. Með öðrum orðum – tæknin er aðeins á valdi hinna bestu. Hugh Kelsey segir sögu af spilinu að ofan í bók sinni The Tricky Game. Það kom upp í tvímenningi í London. Þótt Kelsey væri fæddur Skoti bjó hann lengi í Malasíu og var ekki vel þekktur á heimaslóðum. Suður vissi þó hver hann var – höfundur vinsælla varnarbóka – og treysti honum til góðra verka. Kelsey kom út með hjartagosa gegn 3G. Sagnhafi drap í borði, spilaði tígli á kóng og aftur tígli á tíu og drottningu! Austur fríaði hjartað og síðan komst Kelsey inn á tígulgosa til að taka fríslagina.
„Hvers konar bjánaíferð var þetta í tígulinn?“ hvæsti norður, en suður hélt stillingu sinni: „Ég var að spila vestur upp á Á10x.“ „Jahá! Hélstu að þú værir að spila við Terence Reese?“