Kolbrún Bergþórsdóttir
Það er árið 2024 og mannkynið ætti að vera orðið sæmilega skynsamt. Alls kyns framfarir stuðla þó greinilega ekki að jafnvægi hugans hjá fjölmörgum sem sjá samsæri á ótrúlegum stöðum.
Þegar falleg og góð bresk prinsessa, Kate Middleton, fór í veikindaleyfi eftir erfiða aðgerð og sást ekki opinberlega vikum saman stukku margir til og sögðust vita fyrir víst að hún væri í dái eða þegar látin. Aðrir fullyrtu að hún væri að jafna sig eftir lýtaaðgerð eða algjörlega misheppnaða klippingu, væri í felum af því hún þyldi ekki manninn sinn og svo framvegis. Þegar hún náðist svo á mynd á dögunum ásamt eiginmanni sínum voru ýmsir, þar á meðal fréttamenn, sem sögðu að þetta væri alls ekki hún.
Prinsessan hefur verið til umræðu á hverjum degi í breskum fréttatímum. Hver álitsgjafinn á fætur öðrum er dreginn fram í sviðsljósið en allir segja nokkurn veginn það sama, sem sagt að samsæriskenningar séu fáránlegar, prinsessan sé bara að jafna sig á veikindum. Það þarf svo sem ekki álitsgjafa til að segja manni það. Maður er þó óneitanlega nokkuð undrandi á því hversu óhemju mikil fáviska og vitleysisgangur þrífst í netheimum og ratar síðan út í opinbera umræðu.