Kristín Ósk Óskars Jóhannsdóttir fæddist 25. júní 1974 í Reykjavík. Hún lést 3. mars 2024 í Amsterdam.

Foreldrar hennar eru Guðfinna Óskarsdóttir, f. 4.7. 1952, og Jóhann B. Garðarsson, f. 13.10. 1953.

Systkini hennar eru Garðar Jóhannsson, f. 26.10. 1982. Guðrún Arndís Jóhannsdóttir, f. 21.11. 1985, sonur hennar er Óðinn Kári Guðrúnarson. Marta Jóhannsdóttir, f. 19.2. 1991.

Eiginmaður Kristínar Óskar er Pratik Kumar, f. 28.2. 1977.

Börn hennar í aldursröð eru Guðfinnur Nikulás Sigurðarson, f. 27. 8. 1996, maki Tara Lea Craddock. Dætur hans Hailey May Guðfinnsdóttir og Freyja Louise Guðfinnsdóttir.

Maríus Helgi Sigurðarson, f. 10.12. 1997, maki María Carolina Willassen.

Helga Guðrún Sigurðardóttir, f. 14.12. 1999, maki Viktor Klimaszewski.

Sonur þeirra er Leonard Amir Klimaszewski.

Nanna Kristín Sigurðardóttir, f. 12.5. 2001. Týr Óskar Pratiksson, f. 4.7. 2005.

Kristín lauk grunnskólanámi í Seljaskóla og varð stúdent frá Fjölbrautaskólanum í Breiðholti.

Útför hennar fer fram frá Dómkirkjunni í dag, 21. mars 2024, klukkan 13.

Ástkær dóttir okkar, systir og frænka.

Þau næstum fimmtíu ár sem við áttum með þér voru ekki nærri því nóg. Þú gafst okkur ást þína og umhyggju þá daga sem þú varst með okkur. Það var mikið áfall að frétta af andláti þínu og í öðru landi í ofanálag. Við berum mikinn söknuð í brjósti við þetta snögga fráfall, sem við erum enn þá að vinna úr. Til okkar streyma minningar um fyrri tíð sem við áttum með þér Kristín mín. Þegar þú fæddist 25. júní árið 1974 var vel tekið á móti þér af öllum sem þér kynntust, enda stór fjölskylda. Þú varst glaðvært og rjótt barn. Þú varðst fljótt mjög náin frændsystkinum þínum og þið áttuð góðar stundir saman allt fram á unglingsárin. Þið fóruð í útilegur og utanlandsferð saman en minnisverður er tíminn þar sem þú lékst þér oft með þeim uppi í sumó á sumrin.

Þú tengdist ömmu þinni einstaklega vel og þið urðuð mjög nánar. Mörgum stundum eydduð þið saman á Fálkagötunni, þar sem ættaróðalið var til húsa.

Þegar þú varst sex ára giftist móðir þín Jóhanni sem átti eftir að reynast þér vel, þrátt fyrir að fyrst um sinn hafir þú haft efasemdir sagðir þú oft að hann væri besti pabbi í heimi. Á næstu árum eignaðist þú þrjú systkini og var mjög kært á milli okkar. Síðan eftir að þú laukst námi í FB eignaðist þú fjögur börn með Sigurði fyrrverandi eiginmanni þínum; Guðfinn, Maríus, Helgu og Nönnu. Einnig bættist síðar í hópinn Týr sem þú áttir með Patrik, núverandi eiginmanni. Nú eru börnin þín uppkomin og flutt um allan heim. Við höfum síðustu daga séð hversu sterk börnin sem þú hefur alið upp eru og þau hafa staðið saman sem heild í gegnum sorgina.

En ekki var lífið allt dans á rósum. Þú áttir erfitt áfall á lífsleiðinni sem aldrei yfirgaf þig. Áfall sem dró þig niður niður í myrkrið og virtist ekki ætla að sleppa þér. Okkur þykir erfitt til þess að hugsa að þú fjarlægðist okkur síðustu ár og misstir samband við frændsystkinin sem þú hafðir svo gaman af að vera með. Nú er komið að kveðjustund og við vitum að afi og amma taka vel á móti þér. Að lokum viljum við senda samúðarkveðju til eiginmanns þíns, barna þinna og barnabarna.

Kristín

Vaknaði upp úr værum draum

systir mín var að kalla.

Eins og rifið í sársins saum

verstu fréttir voru að falla.

Horfin er nú systir góð

á vit forfeðra sinna.

Ei langt síðan hér hún stóð

rjóð til sinna kinna.

Farin er loks systir mín

á staðinn sem allir enda.

Yfirgefið hefur okkar sýn

hinstu kveðju vildum senda.

Sárt bíta hjartans rætur

að horfin ertu á braut.

Fjölskyldan eftir grætur

komin ertu í himnanna skaut.

Elsku besta Kristín mín

hvíldu nú í friði.

Við hugsum alltaf hlýtt til þín

þó sársauki okkar bíði.

(Garðar Jóhannsson)

Mamma, pabbi, Garðar, Marta, Guðrún og Óðinn.

Kær fyrrverandi samstarfskona okkar er fallin frá, langt fyrir aldur fram.

Við vorum harmi slegin að frétta af fráfalli Kristínar Óskar. Stína hóf störf hjá Distica árið 2008 í umpökkun fyrirtækisins. Í umpökkun starfar samheldinn hópur og féll Stína strax vel í hópinn, margir fyrrverandi samstarfsmenn hennar starfa enn hjá Distica og minnast hennar með hlýhug.

Stína var skemmtileg, dugleg, klár og lífsglöð, þrátt fyrir að lífið hefði ekki alltaf leikið við hana, í umpökkun í hópi góðra vinkvenna og samstarfsfélaga var oft glatt á hjalla.

Við fengum að kynnast börnunum hennar fimm í gegnum vinnuna og heyrðum oft af sigrum þeirra. Stína var mjög stolt af börnunum sínum og lifði fyrir þau.

Síðustu ár höfum við fylgst með Kristínu, hitt hana nokkrum sinnum og fengið fréttir af henni, því miður varð sambandið minna eftir því sem árin liðu, en hún kom oft upp í umræðunni í umpökkun.

Kæra fjölskylda Kristínar, okkar innilegustu samúðarkveðjur, missir ykkar er mikill og ekki hægt að gera sér í hugarlund hvað þið eruð að ganga í gegnum. Minningin lifir um dásamlega stelpu sem við erum svo þakklát fyrir að hafa fengið að kynnast í leik og starfi.

Fyrir hönd starfsfólks Distica,

Júlía Rós Atladóttir framkvæmdastjóri.