Útlit er fyrir að fjórir leikmenn frá Maccabi Tel Aviv, sem léku gegn Breiðabliki í Sambandsdeildinni í fótbolta í vetur, verði í byrjunarliði Ísraels gegn Íslandi í umspilsleiknum í Búdapest í kvöld.
Samkvæmt ísraelskum fjölmiðlum verður framherjinn reyndi Eran Zahavi fremsti maður, Dor Turgeman og Dor Peretz á miðjunni og Roy Revivo vinstri bakvörður. Zahavi er markahæstur í sögu ísraelska landsliðsins með 34 mörk í 73 leikjum en hann skoraði í báðum leikjum Maccabi gegn Breiðabliki í vetur, sigurmarkið í seinni leiknum á Kópavogsvelli.
Ísraelar sakna síns besta manns, Manors Solomons frá Tottenham, en hann gekkst undir aðgerð á hné í vikunni.
Oscar Gloukh, 19 ára kantmaður Salzburg í Austurríki, verður í byrjunarliðinu en hann þykir gríðarlegt efni og hefur skorað þrjú mörk í fyrstu 11 landsleikjum sínum.