Sonja Sif Þórólfsdóttir
sonja@mbl.is
Bresku eftirlitsstofnuninni um upplýsingamál (ICO) hefur borist tilkynning um að grunur leiki á að brotist hafi verið inn í sjúkraskrá á The London Clinic. Greint var frá því á þriðjudag að spítalinn hefði nú til rannsóknar hvort starfsmaður spítalans hafi reynt að lesa sjúkraskrá Katrínar prinsessu af Wales, án heimildar.
Heilbrigðisráðherra Bretlands, Maria Caulfield, sagði í útvarpsviðtali í gær að hennar skilningur á málinu væri sá að spítalinn hefði óskað eftir aðstoð lögreglu við rannsókn á mögulegu broti. Lundúnalögreglan sagði þó í tilkynningu henni hefði ekki borist beiðni um slíkt.
„Þú mátt ekki skoða sjúkraskrár nema þú hafir annast sjúklinginn, eða hann hafi gefið þér heimild til þess að skoða sjúkraskrána. Minn skilningur er sá að óskað hafi verið eftir aðkomu lögreglu,“ sagði Caulfield.
Að minnsta kosti einn starfsmaður er sagður hafa verið gripinn við að reyna að opna sjúkraskrá prinsessunnar.
Prinsessan lá inni á spítalanum í tvær vikur í janúar í kjölfar aðgerðar á kviðarholi.