Fyrsta græna húsið rís á Frakkastíg 1

Fyrsta græna húsið, eins og það er skilgreint, á Íslandi mun rísa á Frakkastíg 1. Fasteignaþróunarfélagið Iða ehf. reisir húsið en félagið bar sigur úr býtum í samkeppni Reykjavíkurborgar um „grænt húsnæði framtíðar,“ sem hefur það að markmiði að minnka kolefnispor húsnæðis hér á landi um 50% ásamt því að leggja áherslu á að endurnýta auðlindir í uppbyggingunni eins og kostur er.

Húsnæði framtíðarinnar

„Við komum verkefninu af stað, settum saman teymi með dönsku arkitektastofunni Lendager og tillagan okkar varð hlutskörpust á þessum reit og við erum að fara að byggja núna,“ segir Björt Ólafsdóttir, fv. ráðherra og nú framkvæmdastjóri og einn eigenda Iðu, í samtali við Morgunblaðið.

Björt segir aðspurð að félagið hafi verið stofnað í þeim tilgangi að koma að uppbyggingu á grænu húsnæði og fjölbýlishúsið sem rís á Frakkastíg 1 verður fyrsta byggingin sem félagið reisir með þeim hætti.

„Við vinnum eftir þeirri hugmyndafræði og erum að reyna að koma af stað nýsköpun í mannvirkjagerð með því að endurnýta auðlindir og færa það í hringrásarkerfið, segir Björt, spurð nánar um hugmyndafræðina.

Ábyrgur fyrir 30-40% losunar

Að hennar sögn hefur byggingariðnaðurinn setið eftir í framþróun á hringrásarkerfinu og þótt of línulegur þegar kemur að nýtingu auðlinda á byggingarstigi, notkun og þegar húsum er fargað. Mannvirkjageirinn er að hennar sögn ábyrgur fyrir um 30-40% losunar kolefnis á heimsvísu og á Íslandi og af því eru borgir ábyrgar fyrir 90%.

„Á framkvæmdartíma húsa verður til mikil úrgangur af mannvirkjagerðinni og það er ein meginstoðin hjá okkur er að huga að því hvernig auðlindir verði endurnýttar í byggingum og byggja hús sem eru með minna kolefnisspor og álag á náttúru og umhverfið en ella,“ útskýrir hún.

Kostnaðarbókhald um kolefni

Á Frakkastíg er fyrst og fremst verið að hanna hús sem virkar í íslenskum aðstæðum, þ.e. getur þolað vind, jarðskjálfta og regn, en hönnunarferlið er öðruvísi en vanalega.

„Við erum með sömu fasta, þ.e. deiliskipulag sem á að fara eftir, ásamt framkvæmdar- og kostnaðaráætlun sem þarf að ganga upp fyrir fjárfesta og fjármögnunaraðila. Í hönnunarferlinu er haldið kostnaðarbókhald um kolefni hússins og það bókhald þarf að ganga upp við fyrrnefndar breytur. Mismunandi leiðir í byggingarhlutum eru mátaðar við fyrirliggjandi skipulag og metið hvaða leið hentar í kolefnisbókhaldinu miðað við hefðbundið kostnaðarbókhald,“ útskýrir Björt að lokum.