Fulltrúar úr félagi áhugafólks um Downs-heilkennið afhentu Guðna Th. Jóhannessyni forseta ósamstæða sokka að gjöf á Bessastöðum í tilefni alþjóðlega Downs-dagsins sem var í gær.
Sokkarnir eru íslensk hönnun úr smiðju Guðjóns Tryggvasonar fatahönnuðar og Guðjóns Gísla Kristinssonar listamanns, sem fæddist með Downs-heilkenni, og eru tákn fyrir aukinn fjölbreytileika samfélagsins.
Gleðin hélt svo áfram síðdegis í gær í Þróttarheimilinu í Laugardal. Þar var Guðni viðstaddur ásamt fleirum, m.a. Herra Hnetusmjöri sem keyrði stemninguna í gang.
Markmið alþjóðadagsins er að vekja jákvæða athygli á einstaklingum með Downs-heilkenni, lífi þeirra og virkri þátttöku í samfélaginu. Dagsetningin 21. mars orsakast af aukalitningi í litningapari 21.