Sigtryggur Sigtryggsson
sisi@mbl.is
Tvö tilboð bárust í styrkingu snjóflóðavarna á Flateyri, en tilboðin voru opnuð nýlega hjá Ríkiskaupum.
Borgarverk ehf. bauðst til að vinna verkið fyrir krónur 2.123.156.196. Var það 76,3% af kostnaðaráætlun, sem hljóðaði upp á tæpa 2,8 milljarða króna. Suðurverk hf. bauð krónur 2.348.222.243. Framkvæmdasýslan – Ríkiseignir (FSRE) fer yfir tilboðin.
Á Flateyri voru reistar snjóflóðavarnir á árunum 1996-1998 í kjölfar hins mannskæða snjóflóðs árið 1995. Um var að ræða leiðigarða, allt að 20 metra háa, auk 15 metra hás þvergarðs. Allir garðarnir voru byggðir með jarðvegsfláum.
Í kjölfar snjóflóða sem urðu í janúar árið 2020 var ákveðið að styrkja núverandi varnir. Hóf verkfræðistofan Verkís greiningarvinnu að ósk Ofanflóðasjóðs.
Samkvæmt upplýsingum FSRE verður um að ræða 27 keilur sem komið verður fyrir á úthlaupssvæðum flóðanna úr Innra-Bæjargili og Skollahvilft, 16 stykki Innra-Bæjargilsmegin og 11 stykki Skollahvilftarmegin.
Bætt við leiðigörðum
Þá verður þvergarðurinn endurbyggður og hækkaður og bætt við tveimur leiðigörðum. Annars vegar leiðigarði við Sólbakka og hins vegar leiðigarði á hafnarsvæði. Jafnframt verður úthlaupssvæðið (flóðrásin) neðan Skollahvilftar dýpkað á kafla neðan til við núverandi garð.
Garðana skal byggja úr jarðefnum sem eru fengin innan framkvæmdasvæðisins og úr námu, sem staðsett er ca. 1,5 km vestan við byggðina á Flateyri. Flóðmegin verða keilurnar og garðarnir byggðir upp þannig að ofan á jöfnunarlag verður byggt upp jarðvegsstyrkingarkerfi, sem samanstendur af bröttum hliðum og styrktri fyllingu.
Hliðar keilanna verða einnig byggðar upp með þessum hætti. Hlémegin á görðum verða hefðbundnir jarðvegsfláar.
Skipulagsstofnun komst að þeirri niðurstöðu í apríl 2023 að efling ofanflóðavarna við Flateyri skyldi ekki vera háð mati á umhverfisáhrifum.