Tafir verða á afhendingu leikskóla í Dalshverfi III í Reykjanesbæ, sem ber vinnuheitið Drekadalur, en rakaskemmdir eru í byggingunni. Þetta segir Guðlaugur H. Sigurjónsson, sviðsstjóri umhverfissviðs Reykjanesbæjar, í skriflegu svari til mbl.is.
„Já, það hefur orðið vart við leka í byggingunni og þar með rakaskemmdir. Hér er bæði um að ræða leka inn í bygginguna og raka sem komst í einingarnar við uppsetningu,“ segir Guðlaugur aðspurður.
Félagið Hrafnshóll átti upphaflega að skila verkinu af sér í næsta mánuði en ljóst er að því mun seinka og er miðað við afhendingu í ágúst. „Við höfum lagt á það áherslu að gæði gangi fyrir tíma og munum engan afslátt gefa af gæðum verkefnisins þrátt fyrir að við séum í tímapressu,“ segir Guðlaugur.
Hann segir að útboð vegna lóðarfrágangs sé tilbúið og verður það auglýst fljótlega.
„Við erum enn með stefnuna á að þessi leikskóli verði klár í ágúst en ýmislegt getur komið í veg fyrir það, við höldum þó enn í þá von,“ segir Guðlaugur.
Reykjanesbær hefur lagt fram aðgerðaáætlun sem verktaki er að skoða með ráðgjöfum sínum. Guðlaugur segir að bærinn eigi von á skýrslu frá ráðgjöfum verktaka fyrir eða eftir páska og þá verða næstu skref ákveðin.
Drekadalur verður sex deilda leikskóli en samið var við verktakann í maí á síðasta ári. hng@mbl.is