Þegar menn með pólitíska hugsjón komast til áhrifa vilja þeir ná árangri og endilega ekki láta það góða liggja í þagnargildi.
Þannig vatt sér einn ágætur ráðherra nágrannaríkis upp á svið og lýsti með gröfum og súluritum þeim árangri sem hann hefði náð í loftslagsmálum með sinni grænu pólitík.
Hinn vondi útblástur gróðurhúsagasa hefði sem sé stórminnkað í hans valdatíð og hann sá að það var harla gott.
Ekki voru allir sammála þessari pólitísku túlkun og fundu aðrar skýringar á „árangrinum“ en pólitíska snilli. Þannig hefði verð á eldsneyti stórhækkað á viðmiðunartímanum, sem dró úr notkun. Framleiðsla og viðskipti voru í hægagangi og sama gilti um utanríkisverslun.
Einkaneysla í lægri kantinum, og þar við bættust mildir vetur sem spöruðu kyndingu.
Þannig reyndust mörg samverkandi atriði valda þessum áhrifum á útblásturinn, sem kætti ráðherrann en allt batteríið hefði eins getað verið á sjálfstýringu.
Svona er vanþakklátt að vera í pólitík.
Sunnlendingur.