Breikkun er á undan áætlun

Vinna við tvöföldun Reykjanesbrautar hefur gengið vel að undanförnu. Verktakinn, Íslenskir aðalverktakar hf. (ÍAV), segir að svo mikill kraftur sé í framkvæmdum að líklega muni verkið klárast fyrr en áætlað var. Þegar samið var við verktakann voru verklok áætluð 30. júní 2026.

Vegarkaflinn sem um ræðir liggur frá Krýsuvíkurvegi að Hvassahrauni og er síðasti kaflinn í tvöföldun Reykjanesbrautarinnar. Þessi einbreiði kafli, við álverið í Straumsvík, hefur verið einn helsti slysakafli vegarins. Megintilgangur breikkunarinnar er að auka umferðaröryggi á veginum.

Verið er að bora og sprengja í og við hringtorg við Rauðamel og verður áfram næstu tvær vikur, að því er fram kemur á vef Vegagerðarinnar. Við Hraunavík er lokið við að tengja vatnslögn, að grófmóta göngustíg og unnið hefur verið að smíði undirganga. Við Álhellu er unnið við lagnir og fleira. Unnið verður áfram að því og einnig við borun og sprengingar næstu vikur.

Þá er lokið við að steypa plötu í brú í Hraunavík og unnið að uppslætti á brúarvængjum. Að því loknu verður unnið að fyllingum að brúarveggjum. Lagnavinna er einnig í gangi vegna Carbfix. Það fyrirtæki er með stórtæk áform um kolefnisbindingu í Straumsvík.

Verkið sem nú er unnið að snýst í heild sinni um tvöföldun Reykjanesbrautar á um 5,6 kílómetra kafla vegarins ásamt aðliggjandi hliðarvegum. Einnig er innifalin í verkinu bygging fimm brúarmannvirkja og einna undirganga úr stáli. Þetta er samstarfsverkefni Vegagerðarinnar, Hafnarfjarðarbæjar, HS Veitna, Mílu, Orkufjarskipta, Ljósleiðarans, Carbfix og Veitna.

Kvarta yfir hraðakstri

Þrátt fyrir að hraði sé tekinn niður á vinnusvæðinu er algengt að þær hraðatakmarkanir séu ekki virtar. Það skapar töluverða hættu á vinnusvæðinu fyrir þá starfsmenn sem þar vinna og auðvitað fyrir alla vegfarendur. Það eru eindregin tilmæli til ökumanna að hægja á sér og virða hraðatakmarkanir. Þær eru ekki settar að ástæðulausu, segir á vef Vegagerðarinnar.