Bandaríski listamaðurinn Richard Serra, sem einna þekktastur er fyrir stóra en mínimalíska skúlptúra úr stáli, lést í fyrradag á heimili sínu í New York, 85 ára að aldri. Þessu greinir AFP frá. Staðfestir lögfræðingur Serra að hann hafi látist úr lungnabólgu. Verk hans má finna víðs vegar um heiminn, þar á meðal á söfnum í París, í eyðimörkinni í Katar og á Guggenheim-safninu í spænsku borginni Bilbao, þar sem verkið „The Matter of Time“ fyllir út í aðalsal safnsins. Á vef The Guardian kemur fram að fyrrnefnt verk tilheyri verkum sem þyki gjörbreyta rýmunum sem þau eru sett upp í og vekja líkamleg viðbrögð áhorfenda. „Ég vinn á mörkum þess sem er mögulegt,“ sagði Serra eitt sinn. Honum var boðið á Listahátíð í Reykjavík árið 1990 og í kjölfarið reis útilistaverk hans „Áfangar“ í Viðey. Serra fæddist í San Francisco og var menntaður í bókmenntum auk þess að vera með MFA-gráðu í listum frá Yale-háskóla.