Helga Þórisdóttir forstjóri Persónuverndar tilkynnti í gær um framboð sitt til embættis forseta Íslands. Þetta gerði hún á blaðamannafundi á heimili sínu, ásamt stuðningsfólki.
„Mín áhersluatriði sem forseti eru fyrst og fremst að vera þjónn fólksins í landinu – og vera fremst í flokki við að styðja við alla landsmenn. Jafnframt að vera málsvari þess íslenska drifkrafts, sem gerir okkur að þeirri sterku þjóð sem við erum, á eldfjallaeyjunni okkar nyrst í Atlantshafi,“ sagði Helga m.a. í ávarpi sínu. Hún sagði reynslu sína og þekkingu vel geta nýst þjóðinni. Hún hefði unnið að almannahagsmunum alla sína starfsævi. Í þeim störfum hefði það reynst henni vel að þykja vænt um annað fólk og styðja það, og búa þannig til betra samfélag. Helga hefur síðustu átta ár gegnt starfi forstjóra Persónuverndar.