ÍR-ingar eru komnir aftur í úrvalsdeild karla í handknattleik eftir eins árs fjarveru eftir sigur á ungmennaliði Hauka, 36:33, í lokaumferð 1. deildarinnar í Skógarseli á skírdag.
Með því tryggði ÍR sér annað sæti deildarinnar, á eftir ungmennaliði Fram sem vann deildina en getur ekki farið upp.
Róbert Snær Örvarsson skoraði 11 mörk fyrir ÍR í leiknum, Bjarki Steinn Þórisson átta og Baldur Fritz Bjarnason sjö.
Fjölnismenn náðu þriðja sæti deildarinnar með sigri á ungmennaliði KA í Grafarvogi, 32:26.
Liðin í þriðja til fimmta sæti, Fjölnir, Hörður frá Ísafirði og Þór frá Akureyri, fara í umspil um hvert þeirra fylgir ÍR upp í úrvalsdeildina. Hörður og Þór mætast fyrst í einvígi og sigurliðið leikur til úrslita gegn Fjölni.
Einvígi Harðar og Þórs hefst 9. apríl og úrslitaeinvígið hefst 20. apríl.