Lögreglan á Grænlandi segir að verið sé að rannsaka tvö dauðsföll og grunur leiki á að þau hafi borið að höndum með saknæmum hætti.
Í fréttatilkynningu segir að lögreglan hafi verið kölluð til eftir að tvær manneskjur fundust látnar í íbúð í bænum Tasiilaq á austurströnd Grænlands.
Haft er eftir Anette Ostenfeldt, varðstjóra lögreglunnar, að verið sé að rannsaka málið sem grunsamleg dauðsföll. Rannsóknin sé enn á frumstigi og því sé ekki hægt að veita nánari upplýsingar.
Um tvö þúsund manns búa í Tasiilaq sem er sjöundi stærsti bærinn á Grænlandi og sá fjölmennasti á austurströnd landsins.
Að jafnaði rannsakar lögreglan á Grænlandi þrjú til sex morðmál á ári hverju.