Fjölgun íbúa styrki hverfið

„Ég fagna allri uppbyggingu í hverfinu. Með fjölgun íbúa má vænta að nærþjónusta geti eflst sem aftur mun styrkja svæðið,“ segir Björn Ingi Björnsson, formaður Íbúasamtaka Úlfarsársdals. Sem kunnugt er samþykkti borgarstjórn Reykjavíkur á dögunum að hafist yrði handa við að skipulegga íbúðasvæði við Halla og í Hamrahlíðarlöndum í Úlfarsárdal. Þetta var tillaga Kjartans Magnússonar, borgarfulltrúa Sjálfstæðisflokksins.

Verði 3-4 þúsund manna íbúðabyggð

Sagt er að með góðu móti sé hægt að koma fyrir 3-4 þúsund manna íbúðabyggð á fyrrnefndu skipulagssvæði, sem er vestan og norðan við núverandi byggð í Úlfarsárdal. Þetta er nærri því svæði sem heitir Grund, þar sem lengi var aðstaða fisflugmanna. Í grenndinni er einnig byggingavöruverslunin Bauhaus. Nú búa um 5.500 íbúar í Grafarholti og 3.000 í Úlfarsárdal. Verði byggt í Halla og Hamrahlíð myndi verulega bætast við, en þó má halda því til haga að upphaflega var gert ráð fyrir að hverfið í Úlfarsárdal yrði miklu fjölmennara, eða að þar byggju 20-30 þúsund manns.

„Fyrir nokkrum árum stóð til að breyta aðalskipulagi og taka væntanlegt íbúðasvæði undir iðnaðarstarfsemi. Þau áform náðum við íbúar að koma í veg fyrir. Nú verður þarna blönduð byggð með þrifalegum vinnustöðum og ég tel fara vel á slíku. Þessi hluti Úlfarsárdalsins er svæði mikilla tækifæra, en þá þarf líka að hugsa fyrir því að samgöngur á svæðinu verði greiðar og skoða fyrirkomulag skólamála. Ég vona líka að þetta flýti fyrir því að Fram, sem er með sína aðstöðu í Úlfarsárdal, fái líka sem fyrst knatthúsið sem þeim var lofað. Einnig myndu margir vilja fá matvöruverslun í dalinn, umræðan meðal íbúa hefur verið sú,“ segir Björn Ingi Björnsson.

Dóra Björt Guðjónsdóttir, formaður skipulagsráðs Reykjavíkur, segir að nú sé yfirstandandi vinna átakshóps við að hraða húsnæðisuppbyggingu í borginni. Bregðast þurfi við, m.a. vegna ástandsins í Grindavík.

„Tillögu Sjálfstæðisflokks var vísað inn þennan hóp en svo mun koma í ljós hvort þessar hugmyndir séu meðal þeirra verkefna sem eru þar í forgangi. Það fer væntanlega eftir því hvort þær séu metnar vera til þess fallnar að styðja við markmið um hröðun uppbyggingar á hagkvæman hátt,“ segir Dóra Björt og heldur áfram:

Önnur svæði bera fjölgun betur

„Ein stór áskorun á þessu svæði er að grunnskólinn ber ekki mikla fjölgun. Svo telja líklega flestir nægt álag á Ártúnsbrekku nú þegar svo ekki sé jákvætt skref að auka þar á. Því skiptir tilkoma skilvirkra almenningssamgangna miklu máli þarna. Aukin uppbygging þyrfti að vera í takt við tilkomu borgarlínu og aukinn árangur í því að breyta ferðavenjum. Jafnvel þótt það gæti verið talið góð þróun að byggja meira í Úlfarsárdal til lengri tíma er líka spurning hvaða tímapunktur hentar. Enn er svigrúm til uppbyggingar á svæðum þar sem innviðir bera fjölgunina betur enda kostar uppbygging hvers grunnskóla fleiri milljarða. Aðrar lausnir eru enn sem komið er líklega skynsamlegri þegar kemur að samgöngutengingum.“