Í Kópavogi
Víðir Sigurðsson
vs@mbl.is
Kvennalandslið Íslands í knattspyrnu hóf undankeppni Evrópumótsins 2025 eins og best verður á kosið með því að sigra Pólverja, 3:0, í fyrsta leiknum á Kópavogsvelli í gær.
Íslenska liðið slapp með skrekkinn strax á 12. mínútu þegar Fanney Inga Birkisdóttir varði úr dauðafæri frá Ewu Pajor sem skaut í þverslána í kjölfarið.
Eftir jafnan fyrri hálfleik komst Ísland yfir á lokamínútum hans þegar Bryndís Arna Níelsdóttir átti skot af stuttu færi, boltinn var á leið framhjá markinu en fór beint í höfuð pólsks varnarmanns og þaðan í netið.
Mínútu síðar var staðan orðin 2:0 þegar Diljá Ýr Zomers skoraði með skalla eftir fyrirgjöf Sveindísar Jane Jónsdóttur frá vinstri.
Sveindís gerði út um leikinn með þriðja markinu á 65. mínútu þegar hún fékk boltann frá Karólínu Leu Vilhjálmsdóttur, sneri sér og skaut í hægra hornið niðri. Ísland hafði öll tök á leiknum eftir það og mörkin hefðu getað orðið fleiri.