Annar leikur Íslands í undankeppni EM kvenna í knattspyrnu fer fram í Aachen í dag þar sem liðið mætir öflugu liði Þýskalands.
Ísland vann Pólland 3:0 í fyrstu umferðinni á föstudaginn á meðan Þýskaland vann Austurríki, 3:2, á útivelli.
Þýska liðið vann það íslenska mjög örugglega, 4:0, í Düsseldorf í Þjóðadeildinni í haust og svo aftur, 2:0, eftir mun meiri mótspyrnu á Laugardalsvellinum en þar réðust úrslitin ekki fyrr en í uppbótartíma leiksins.
Þjóðverjar eru afar sigurstranglegir í riðlinum en tvö efstu liðin komast beint á EM 2025 og hin tvö liðin fara í umspil í haust.
Líklegt er að Þorsteinn Halldórsson tefli fram sama liði, eða lítið breyttu, frá sigurleiknum gegn Pólverjum. Karólína Lea Vilhjálmsdóttir átti þó í erfiðleikum þar og fór af velli eftir að hafa tvisvar þurft aðhlynningu í leiknum.